Pastorada 2011

Mayoral

      1. Biembenido sía

iste seleuto auditorio

de o que pasa por o mundo

yo quio daros notorio.

      2. En o mío nombre y de os

      danzantes en primeras queresa

      agradezer que estez con tanta atenzión

toa ista caterba chen.

 

      3. Que mamá siempre me ha dito

      que o primero ye a educazión

pos si por algo me podez carrañar

no ye ixa a mía intenzión.

      4. Si ez parau cuenta

que a mía fabla ye un siñal aspra

Buen cabal!

Santa Orosia me entiende,

que yo le charro a ella

dende aíntro d’a mía alma.

      5. Grazias tamién

      a os romeros

que de tantos lugars eis plegau

con o ropón y o palo

como tantos antepasaus.

      6. Grazias a os cruzeros

que’n bienen de toda a Montaña

trayez a millor joya buestra

pa engalanar ista fiesta.

      7. Y a os zereños banderistas

de ro Balle y Sobrepuerto.

Qué argüellosos nos sentimos

de que abandiez sin rangüello!

      8. Memoranza pa os que iste día

con nusotros no puen estar

Santa Orosia se alcordará

de a fé que le eis tenido en bida.

Punto

Cantas

      9. ¡Cuánto gozo, qué contento

de golber-nos a alcontrar

pa astí chuntos zilebrar

a fiesta e Santa Orosia!

10. Alas me das pa puyar

fuerzas d’ande yo no’n tiengo

y to por bier-le a cara

a ra Santa que más quiero

Mayoral

12. No pensez que me trión

por ser o más pincho y agudo,

u como fizon en Agüero

pa trobar alcalde nuebo:

13. Toa ra billa se achuntó

y se alcordó que se abentase

ta l’aire un manzañón;

o cargo l’iba a quedar

pa o primero que lo pillase.

14. Grans istantes de tensión,

a manzana que marcha a pintacodas,

p’astí pasó un goliñón

y ascape l’en lebó t’a boca.

15. Hai que bier a o cochín

con a banda y o tocho de mando.

O bien que posa en as fotos

y lifaras, de cuando en cuando.

16. Os discursos no son o suyo,

No charra por no escañar-se,

Tot ro día foricando,

no sé si be d’estar uscando

a traza de salir d’a crisis

pero siempre con talante.

17. Ye honrau como él solo

y no’n cobra de comisions.

Tiendrá o boto mío pa cutio

si me dona ro zancarrón.

18. Ya suena p’a Diputazión

y tamién pa ra Moncloa

de sustituto e Zapatons

que ya pai que tiene cansera

y se le han acachau asta as zellas.

Punto

Rebadán

19. ¿Qué tal plantas, mayoral?

Fa días que no te bieba.

No te busas de azercar

por istos zinglos y catarreras.

20. No pensez que paso pena

de no bier-te más a ormino

u tener-te en compañía

porque ya lo dize o dicho:

21. Tío que no regala

y astraleta que no corta

anque se pierdan poco importa.

22. Pero ya que estás aquí

prenzipiaré o mío treballo

echando-me un lamparazo,

que tamién os santos bebión

23. Aquí tiens a mía bota

y mientras en aiga una gota

enchuagaremos a gargamela

con a mía churrumela!

(beben)

24. Qué argüello estar repatán!

No sé cómo le irá a yayo

no be de parar de gramar

ixe moquero d’a manga

ya lo podeba abentar.

25. Cuatro consellos me ha dau

pa que no faga o zeneque:

Uno, que chile fuerte,

to sía que no esberreque.

26. Otro, que me acotrazíe bien,

no tenez más que bier-me.

Sobre to que no me dé a entender,

no me carrañen bustedes.

27. O zaguero y más importante

que a Santa Orosia tienga presente.

Por ixo templaremos a guitarra,

como l’imos feito siempre.

Canta

28. Cuan yo rezo a Santa Orosia

y tamién a San Lorenzo

son trozicos d’a mía alma

os que salen d’o mío peito.

Mayoral

29. Alparziaremos d’o mundo

Asabelo o que cambea!

Ye pa tornar-se tarumba

d’as fatezas que tramena.

30. Agora que astí tos beigo

a toz un siñal rinchaus,

cofladizos en a mosquera

y refirmaus en a buxiquera;

31. bien royos y entiparraus

que pai que pa busotros

a crisis s’aiga acabau.

32. D’os euros to o mundo charra.

Ya me direz como son

porque yo no’n beigo garra

ni anque lebe as antiparras.

33. Toz entrampaus asta as orellas

y a chen sin salir de casa.

No nos joriamos pero...

lo menos no se gasta.

34. Solo beigo que abundan

d’ixas botigas d’os chinos

paizen una imbasión

como en otoño os robellons.

35. Cualsiquier cosa puez trobar:

una furrufalla e cataticos.

De tot menos chinos

con a tufa plena e rizos.

36. U ropa a ra moda e Taiwán,

trafallons y trapicallos

que con toa a borrilla que sacan

plenan ambute de lana

ixos colchons d’antes más.

37. Abren n’a mañanada asta as tres,

domingos y fiestas de guardar.

Pero ixo, en Casa e Santiago

fa añadas lo iban imbentau.

38. Yo, con o mío ofizio

ya puedo estar tranquilo,

que no me lo quitarán.

¿Eis conozido bel pastor chino?

y a razón ye clara:

¿Cuán eis bisto minchar

as sopas de allo y as migas

armaus nomas con palillos?

Punto

Repatán

39. En iste zentenario de Costa,

gran pensador aragonés,

me te miro y tos comparo

y beigo que tamién tú piensas

pero solo que en as mullers.

40. En poco más paras cuenta

si alcaso en comer y beber.

Le tiens fe a Santa Orosia,

pero más a San Miguel (gesto de beber).

41. Pocos te ganan a chandro

y ya estás contando os días

que te mancan p’a chubilazión.

Pos prenzipia a contar-ne atra bez

que a os años que te’n quedaban

les tiens que sumar-ne dos.

42. Pa ro unico que le baga

ye pa pasiar o goliñón

que aura le dizen mascota!!!

mercau en a Feria Biescas

y que le costó un riñón.

43. Ye un chabalín faldero

mui guito y conzietero.

Cuan yera solo un rayón

tanto cariño le cogión

que cuasi lo trataban d’a familia,

como a o cuñau.

44. Muito lo quereban

mientras no le crezión

os catirons en as bariellas.

Pero aura que ya ba armau

tal sofoco les ha entrau

que s'en tienen que ir de casa

45.  y a o chabalín lo alcuentras

resopinau en o sofá

u acarrazau en o radiador,

y que d'allí no s'en ba.

46. Esti año no te han dau

cosa más que disgustos.

Denzima de toa ra crisis

ya no t’ejan ni fumar

echando a partida n’o bar.

47. O gubierno ye tot zerrino

en baxar o gasto n’o fumeque

y n’os mentideros se sentiba

que asta quereban quitar

o Miercóles de Zeniza.

48. Me se caye l’alma ta os pies

cuan beigo una colla e chen

en a puerta o bar toz pretos

que en be de fer botellón

los tiens en pleno ibierno

fendo astí ro “fumarrón”.

49. O gasto en tabaco baxará

pero no o d’os antigripals.

Punto

Mayoral

50. Agora que fas memoranza

de ro ilustre Costa

tamién me quereba alcordar

de José Antonio Labordeta

 nuestro aragonés más gran.

51. A mochila le pesaba masiau

Pa esnabesar por iste mundo

y marchó con Santa Orosia

a qui le dedicó unas coplas.

52. Aun resuenan en Yebra

os ecos d’o rezital

que con Carbonell y La Bullonera

a toz fizon cantar.

53. Yeran piors tiempos

con os grises y zebils

pero alegría no’n faltaba

y fuerza pa demandar

un Canto a ra libertá.

54. Toz unidos con as manos.

Toz una sola boz.

Un solo sentimiento:

nuestra tierra, Aragón.

55. Dende aquí nos queremos sumar

a ra iniziatiba popular

de que ixa biella canta

siga a nuestra representazión,

o nuebo Himno de Aragón.

Punto

Y pa poder rematar

a chanzoneta y os dichos...

Cantas final

Te conozié n’iste Puerto

me prendé de tú y d’a Santa

dende antonzes siempre biengo

porque si no, algo me falta.

Asinas yo tos espido

plantar fuerte y no reblar,

que otra añada n’ista fiesta

nos golbamos a alcontrar.